त्रियुगाका ६३ सय ६३ किशोरीलाई पाठेघरको मुखको क्यान्सरविरुद्ध खोप लगाइने

उदयपुर । त्रियुगा नगरपालिकाका ६३ सय ६३ किशोरीलाइ पाठेघरको मुखको क्यान्सरविरुद्ध खोप ‘ह्युमन पापिलोमा भाइरस’ (एचपिभी) खोप लगाइने भएको छ ।

कक्षा ६ देखि १० सम्म र विद्यालय बाहिर रहेका १० देखि १४ वर्ष उमेर समूहका किशोरीलाई खोप लगाइने छ । किशोरीलाई सानै उमेरबाट नै क्यान्सरबाट जोगाउन खोप अभियान सञ्चालन गर्न लागिएको त्रियुगा नगरपालिका उदयपुरका मेयर बसन्त कुमार बस्नेतले बताउनुभयो ।

माघ २३ गते देखी २८ गते सम्म सञ्चालन हुने खोप अभियानका लागि त्रियुगा नगरपालिका भित्र  बिद्यालय र समुदायमा गरी १ सय ३ केन्द्र तोकिएको छ जसमा १ सय १० जना स्वास्थ्य कर्मी र २ सय १३ स्वयम सेवक खटिने मेयर बस्नेतले बताउनुभया ।

यस्तै सरकारले आगामी वर्षबाट नियमित खोप अभियानमा समेत पाठेघरको मुखको क्यान्सरविरुद्धको ‘एचपीभी’ खोप समावेश गराउने जनाइएको छ । नेपालमा हरेक वर्ष पाठेघरको मुखको क्यान्सरबाट चार जना महिलाको मृत्यु हुने गरेको छ ।  ‘एचपिभी’ खोप ‘भ्याक्सिन र खोपका लागि ग्लोबल एलायन्स’ (गाभी)को सहयोग रहेको नगरपालिकाका स्वास्थ्य शाखा प्रमुख किरण कुमार कार्कीले बताउनुभया  ।

पाठेघरको मुखको क्यान्सरको जोखिम बढाउने मुख्य कारण ह्युमनपापिलोमा भाइरस सङ्क्रमण रहेकाले त्यसविरुद्ध खोप लगाउनुपर्ने स्वास्थ्यकर्मीको भनाइ छ । यो भाइरस कलिलो उमेरमा विवाह गर्ने, कलिलो उमेरमै बच्चा जन्माउने धेरै जनासँग यौन सम्पर्क राख्ने, अंकमाल गर्ने जस्ता कारणले यो सर्ने बिज्ञको भनाइ रहेको छ ।

नेपालमा सबैभन्दा बढी महिलामा लाग्ने क्यान्सरमध्ये पाठेघरको मुखको क्यान्सर बढी देखिने र त्यसपछि स्तन क्यान्सर रहेको छ । चिकित्सकका अनुसार नेपालमा महिलाको मृत्यु हुने प्रमुख कारणमध्ये पाठेघरको क्यान्सर एक हो । पाठेघर मुखको क्यान्सर हुने मुख्य भूमिका ह्युमन प्यापिलोमा भाइरस (एचपीभी) को कारण हुन्छ ।