माघ २३ देखी उदयपुरमा पाठेघरको मुखको क्यान्सर प्रतिरोधात्मक खोप लगाइने

उदयपुर । उदयपुरमा यही माघ २३ गतेदेखी महिलाहरुमा हुने पाठेघरको मुखको क्यान्सर बिरुद्ध खोप लगाइने भएको छ । स्वास्थ्य कार्यालय उदयपुरले मंगलबार एक कार्यक्रमको आयोजना गर्दै माघ २३ देखी फागुन ७ गते सम्म दुइ चरणमा पाठेघरको मुखको क्यान्सर बिरुद्ध (एच.पिभी) खोप लगाउन लागिएको जनाएको छ ।

पहिलो चरणमा त्रियुगा नगरपालिका, बेलका नगरपालका, लिम्चुङबुङ गाउँपालिका र रौतामाई गाउँपालिका यस्तै दोस्रो चरणमा कटारी नगरपालिका, चौदण्डीगढी नगरपालिका, ताप्ली गाउँपालिका र उदयपुरगढी गाउँपालिकामा लगाईने भएको छ ।

खोप केन्द्र विद्यालयमा २८३, स्वास्थ्य संस्थामा ९२ समुदाय तथा खोप केन्द्रमा २१ गरी ३९६ ओटा खोप केन्द्रहरु तोकिएको जिल्ला स्वास्थ्य कार्यालय उदयपुरका सुचना अधिकारी चिरन्जिबी निरौलाले जानकारी दिनुभयो ।

निरौलाका अनुसार खोप १० देखी १४ बर्ष उमेरका कक्षा ६ देखी कक्षा १० सम्म अध्यनरत २० हजार १ सय २२ जना किशोरीहरुलाइ निशुल्क लगाइने भएको हो । जसको लागि स्वास्थ्यकर्र्मी ४०३ र स्वयम्सेवक ७९९ गरी १२ सय २ जना जनशक्ति खटाईदै छ ।

पाठेघर मुखको क्यान्सर यौन सम्पर्क, अंकंमाल, चुम्बन गर्दा र्यालको सम्पर्कबाट सर्ने गरेको पाईएको छ । विश्वमा ५ लाख ७० हजार महिलाहरुमा पाठेघरको मुखको क्यानसर हुँदा ३ लाख ११ हजार महिलाहरुको मृत्यु हुने गरेको तथ्याङकमा उल्लेख छ । नेपालको सन्दर्भमा भने २१९९ लाई पाठेघर मुखको क्यान्सर हुँदा १३१३ जनाको मृत्यु हुने गरेको छ । यस हिसावले प्रत्येक दिन पाठेघरको मुखको क्यान्सरकै कारण ४ जना आमाहरुको ज्यान जाने गरेको छ ।

एक नयाँ अध्ययनका अनुसार एचपीभी खोपले ९० प्रतिशतसम्म पाठेघरको मुखको क्यान्सरको जोखिम घटाउँछ ।