राजाबास फुटवलको उपाधि आयोजकले उचाल्यो

उदयपुर
ग्रामिणभेगमा खेल प्रतिको वढ्दो आकर्षणलाई प्रोत्साहन दिने उदेश्यले उदयपुरको रौतामाई गाउँपालिका ७ राजाबासमा आयोजना गरिएको फुटवल प्रतियोगितको उपाधि आयोजक राजाबास युवा क्लवले चुमेको छ ।ट्राईवेकरमा रौता स्पोर्टस क्लवलाई पछि पार्दै आयोजक राजाबासले उपाधि रक्षा गरेको हो । ६० मिनेटको निर्धारित समय गोल रहित बराबरीमा टुङ्गिएपछि खेल ट्राईवेकरमा पुगेको हो । ट्राईवेकरमा ४–२ को गोलअन्तरले आयोजकले जित निकालेको हो ।

आयोजकका पाँच जना खेलाडीले प्रहार गरेको सुट चार वटा सुन्दर गोलमा परिणत भएको थियो भने एक गोल विपक्षी गोलरक्षकले रोकेका थिए । त्यस्तै रौताका पाँच जना खेलाडीले प्रहार गरेको सुट दुई वटा गोलमा परिणत भयो भने बाँकी तीन वटा गोलरक्षक निमा शेर्पाले रोके ।
जितसँगै आयोजकले नगद बीस हजारसहित ट्रफी प्राप्त गरेको छ । उपविजेता रौतास्पोर्टसले दश हजार नगद र ट्रफीमा चित्त बुझाउनु पर्यो । प्रतियोगितामा उत्कृष्ट गोलरक्षक शेर्पालाई नगद र ट्रफीले सम्मान गरिएको थियो ।

विजेता र उपेविजेता समुहलाई कोशी प्रदेशसभाका उपसभामुख सृजना दनुवारले नगदसहित ट्रफीले सम्मान गरिन् । राजबास युवा संजालको आयोजना गरेको प्रतियोगितामा रौतामाई, त्रियुगा, उदयपुरगढीका गरी १२ वटा टिम सहभागिता रहेको अध्यक्ष कृष्ण राईले जानकारी दिए ।
राईले ग्रामिणभेगमा खेलकुदको चाहाना राख्ने प्रतिभावान युवाहरु हुनुहुन्छ जो अवसर नपाएर बस्नु भएको छ, त्यसैले उनीहरुको अवसर र प्रतिभा प्रस्फुठनका लागि प्रतियोगिता राखिएको बताए । उनले आगामी बर्ष यसलाई राशी बढाउँदै अझ धेरै व्यापक बनाएर लैजाने बताए ।

सहभागि खेलाडीलाई बधाई तथा धन्यवाद दिँदै प्रमुख अतिथि उपसभामुख दनुवारले पछिल्लो समय खेलकुदले अनुशासन सिकाउँदै देशलाई नै गौरव बनाएको बताईन् । उनले ग्रामिणभेगका खेलाडीलाई मध्यनजर गरी खेलकुद क्षेत्रको वृहत्तर विकासमा तीनै तहका सरकार लागि पर्नु पर्ने बताए ।