द.कोरियामा संकलित रकम शान्तिलाई हस्तान्तरण

उदयपुरे युवाहरुको अगुवाईमा २ लाख ३३ हजार ६०२ रुपैया संकलन
उदयपुर, फागुन २७
उदयपुरको त्रियुगा नगरपालिका ११ बोक्से (नयाँबस्ती) की बोनम्यारो पिडित शान्ति राईलाई दक्षिण कोरियामा संकलन भएको सहयोग रकम आइतबार हस्तान्तरण गरिएको छ ।
कोरियामा कार्यरत उदयपुरका युवाहरु सन्जिब राई, निश्चल बान्तवा (मनोज) र गोपीकृष्ण राईको अगुवाईमा संकलित सहयोग रकम २ लाख ३३ हजार ६ सय २ रुपैया एक कार्यक्रमकाबीच मिडियामार्फत हस्तान्तरण गरिएको हो । शान्ति राई बचाउ अभियान समितिको पदाधिकारीहरुको रोहबरमा शान्तिकी बुवा डिगबहादुर र आमा रामकुमारी राईलाई मिडियाको तर्फबाट नेपाल पत्रकार महासंघ उदयपुरका उपाध्यक्ष भोटराज राईले हस्तान्तरण गर्नुभयो । शान्ति उपचारको क्रममा काठमाडौं रहेकीले उनको बुवाआमालाई रकम हस्तान्तरण गरिएको हो । योसंग शान्तिलाई २६ लाखको हाराहारीमा सहयोग रकम जुटेको शान्ति राई बचाउँ अभियान समितिका अध्यक्ष ज्ञान राईले बताउनुभयो ।
अस्पतालमा हुनुपर्ने विरामी शान्ति, घरको नाजुक अवस्थाका कारण घरमै बसिरहेको अवस्थामा मिडियाले खबर प्रकाशन÷प्रशारणका साथै उनको अवस्थाको बारेमा भिडियो सार्बजनिक गरेको थियो । सबैभन्दा पहिले खबर प्रशारण गर्ने एभिन्यूज खबर टेलिभिजन तथा सुरुदेखि हालसम्म भिडियो प्रशारण तथा फलोअपमा रहेका पूर्णपुष्टि, तुवाचुङ, निगरानीपोष्ट, ट्रेन्डिङडोज, इलाकापोष्ट, पूर्वेलीदर्पण, नागरिकबहस, सिके अनलाईनटिभि लगायतको उपस्थितिमा हस्तान्तरण गरिएको हो ।
निको भएर राम्रो शिक्षिका बन्ने सपना बोकेकी शान्तिको बोनम्यारो नै फेर्नुपर्ने अवस्था छ । भारतमा बोनम्यारो फेर्नका लागि २५ लाख रुपैया लाग्ने र अन्य थप १५ लाखबढि खर्च आवश्यक पर्ने परिवारको अनुमान छ । शान्तिलाई सहयोग रकम जुट्ने क्रम जारी रहेको समितिले जनाएको छ ।